Kryebashkiaku Erion Veliaj: Tirana di t’i nderojë figurat e saj

Një pemë në qendër të Tiranës për mexosopranon e njohur shqiptare, Rozmari Jorganxhi, e cila u nda nga jeta një vit më parë, në moshën 83-vjeçare.

Familjarë, miq, artistë apo ish-nxënës e studentë të këngëtares me famë ndërkombëtare u mblodhën për ta përkujtuar përmes një ceremonie të organizuar nga Bashkia e Tiranës, në nder të figurës së njohur të Teatrit të Operas dhe Baletit dhe jo vetëm, pasi Jorganxhi 10 vitet e fundit të karrierës së saj ia kushtoi Teatrit “Giusepe Verdi” në Trieste të Italisë.

“Është vërtet emocionuese të jem sot këtu me shumë miq, per te përkujtuar nje personalitet si Rozmari Jorganxhi,” u shpreh mes emocionesh, kryetari i Bashkisë së Tiranës, Erion Veliaj, pas performancës muzikore të mbajtur nga grupi muzikor “Rozafa Expression”, dirigjuar nga profesor Zef Çoba, ish-nxënës i solistes lirike, po ashtu dirigjente e korit të TOB.

“Sot jam i nderuar që do të mbjellim një pemë mu në zemër të qytetit, për të kujtuar të dashurën tonë Rozmari Jorganxhi. Ditë si kjo na kujtojnë personalitetet që do mbeten këtu edhe kur ne kalimtarët të mos jemi më. Teksa mbjellim këtë pemë sot, një përkujtim shumë i veçantë, dua që sa herë që të kaloni e të shihni atë pemë që hedh rrënjë, të kujtoni mikeshën tonë dhe ata që lanë gjurmë në qytetin tonë. Kur të shkruhet historia nuk do mbahet mend zhurma, por do mbahet mend muzika, e cila do ketë një vend të veçantë në memorien, por edhe në hapësirën fizike të këtij qyteti,” tha më tej kryebashkiaku Veliaj.