Vetëvendosja në Tiranë: Greqia i bëri “dhuratë” vetes për Krishtlindje 12 milje det shqiptar

Boiken Abazi, themeluesi i Vetëvendosjes në Tiranë ka reaguar lidhur me zyrtarizimin e dekretit të qeverisë greke për zgjerimin e ujërave territoriale nga 6 në 12 milje detare (md) në Detin Jon.

Në një postim në Facebook, Boiken Abazi shkruan se “Greqia i bëri sot për Krishtlindje “dhuratë” vetes zyrtarizimin e dekretit për zgjerimin e ujërave territoriale nga 6 në 12 milje detare (md) në Detin Jon“.

Më tej, Abazi shton se “kjo “dhuratë” nuk do kishte qenë e mundur pa Edi Ramën, që kishte premtuar publikisht muaj më parë se nuk do ia kontestonte, edhe pse në kurriz të territorit detar shqiptar“.

Postimi i plotë Facebook: 

Greqia i bëri sot për Krishtlindje “dhuratë” vetes zyrtarizimin e dekretit për zgjerimin e ujërave territoriale nga 6 në 12 milje detare (md) në Detin Jon, si për të dëshmuar që shteti grek nuk ka hequr dorë nga trashëgimia politike e keqpërdorimit të fesë në funksion të ekspansionit territorial. Mirëpo, kjo “dhuratë” nuk do kishte qenë e mundur pa Edi Ramën, që kishte premtuar publikisht muaj më parë se nuk do ia kontestonte, edhe pse në kurriz të territorit detar shqiptar.
Në Gjykatën Ndërkombëtare të Drejtësisë në Hagë, Shqipëria nuk e çon dot kontestimin e këtij zgjerimi të Greqisë nga 6 në 12 md, sepse aty nuk mund të shtrohen çështje pa miratimin paraprak të Greqisë. Ajo çka Rama dhe Micotaqis kanë rënë dakord të çojnë në Hagë është ndarja e zonave ekskluzive ekonomike që nisin pas ujërave territoriale, dhe tashmë pasi Greqia e ka bërë fakt të kryer ekspansionin me 12 md.
E vetmja mundësi që kemi si shtet për të vendosur drejtësi përmes ligjit ndërkombëtar për këtë akt grabitqar të Greqisë, është kontestimi përmes Aneksit 5 të Konventës mbi të Drejtën e Detit – por Qeveria Rama refuzon ta aktivizojë.