VIDEO/ Ministri Gonxhja: Politika lehtësuese për inkurajimin e prodhimit vendas

Lehtësitë fiskale dhe përmirësimi i klimës së biznesit kanë nxitur investimet e reja të bizneseve në sektorë të ndryshëm të prodhimit dhe ekonomisë.

Ministri i Ekonomisë, Kulturës dhe Inovacionit, Blendi Gonxhja vizitoi pastiçerinë “Nela” në Tiranë. Për të është shembull i sipërmarrjes vendase që zhvillohet falë përkushtimit, cilësisë dhe mbështetjes së duhur.

Gonxhja u njoh nga afër me punën e këtij biznesi, sfidat dhe synimet që ka kjo sipërmarrje për të ardhmen. “Ky është një biznes familjar, i cili tregon qartë se kur krijohen kushtet e favorshme për investitorët, përmes lehtësirave fiskale, thjeshtimit të procedurave dhe politikave që inkurajojnë prodhimin vendas, rezultatet janë të prekshme dhe afatgjata”, tha Gonxhja.

Ministri vuri në dukje se fokus i qeverisë është mbështetja e biznesit të vogël. ”Mbështetja ndaj bizneseve të vogla dhe të mesme është jo vetëm një prioritet, por një angazhim i vazhdueshëm për të forcuar strukturën ekonomike të vendit dhe për të nxitur rritjen e qëndrueshme në çdo cep të Shqipërisë”.