VIDEO/ Rama: Copëza mozaiku turistike nga Berati, nga vreshtat e agroturizmet deri tek sportet e aventurës

Berati vijon të jetë ndër destinacionet kryesore që vizitohet nga mijëra turistë në të gjitha stinët e vitit. Kryeministri Edi Rama ka postuar një video, ku shkruan ”Copëza mozaiku turistike nga Berati, nga pjesa muzeale tek vreshtat e agroturizmet e deri tek sportet e aventurës ”.

Përtej shijimit të pjesës muzeale, Berati është shndërruar edhe në një pikëtakim fantastik të përvojave të sporteve të aventurës. Berati, tashmë qytet i UNESCO-s, të ofron ndër të tjera plot shtëpi të epokës otomane, struktura mbresëlënëse të kështjellës dhe kishave mistike dhe xhamive, të vendosura në krah të kodrave dhe maleve që kanë në mes lumin Osum.,

Kalaja e Beratit është një nga atraksionet më piktoreske në zonë. Kjo kështjellë e epokës romake ulet sipër një kodre shkëmbore në bregun e majtë të lumit Osum me pamje nga qyteti i Beratit. Numri i vizitorëve ka ardhur gjithnjë e në rritje dhe ky sezon veror ka pritshmëri të lartë jo vetëm në Berat por edhe në destinacionet e tjera turistike të vendit.