Vjedhja e bujshme, avokati i sanitares: S’dyshohen për bashkëpunëtorë të tjerë
Nënë e bir janë kryefjala e lajmeve në Shqipëri. Artan Gjermeni, avokati i Rozeta dhe Havier Dobi thotë se vjedhja e mijëra eurove në banesën e Alda Klosit është kryer në bashkëpunim nga nënë e bir. Për të nuk ka dyshime për bashkëpunëtorë të tjerë në grabitjen spektakolare.
“Nuk ka akuzë për grabitjen por për vjedhje. Deri në këtë fazë dyshimin më i arsyeshëm i konstatuar nga gjykata është për bashkëpunimin e nënë e bir për vjedhjen e kësaj pasurie. Deri sot nuk kemi definicionin që të konstatojë hapësirën në kohë dhe hapësirë. Dyshimi i arsyeshëm është për vjedhje në një rast, për banesën e zyrtares Alda Klosi”, tha avokati për ”Euronews Albania”.
Nënë e bir, Rozeta Dobi dhe Havier Dobi janë lënë sot në burg, pasi akuzohen për vjedhjen e mijëra eurove, dollarëve si dhe një sasie aksesorësh floriri në banesën e ish-zyrtares së lartë, Alda Klosi. Nënë e bir nuk kanë dhënë asnjë deklaratë para gjyqtarit Arben Micku që udhëhoqi dhe seancën gjyqësore.
