Yuri Kim: Tregohuni të pamëshirshëm përballë krimit, SHBA krah jush

Ambasadorja e SHBA ndodhej ditën e sotme në Pikën Kufitare të Kakavijës, pasi SHBA ka dhuruar disa pajisje për këtë pikë kufitare.

Në ceremoninë e organizuar me këtë rast, ambasadorja e SHBA në Shqipëri tha se kufijtë e sigurt nuk janë të rëndësishëm vetëm për Shqipërinë, por edhe fqinjët e saj, për sigurinë globale që përfshin edhe SHBA.

Më tej, Kim tha se mbrojtja e kufijve nga qarkullimi i armëve dhe drograve është thelbësore për sigurinë rajonale.

Kim, gjithashtu, iu dërgoi një mesazh agjencive ligjzbatuese në vend që të tregohen të pamëshirshëme përballë trafikimit të paligjshëm dhe formave të tjera të krimit.

 “Kam qenë drejtoreshë e zyrës përgjegjëse për çështjet e mesdheut Lindor që përfshinin edhe Greqinë, është kënaqësi të shoh flamurin e SHBA, Shqipërisë dhe Greqisë të valëviten pas meje. Ministri, ambasadori, drejtori Veliu është kënaqësi që ndodhem këtu në Kakavijë në një nga pika kryesore të hyrjes në Shqipëri. Kufijtë e sigurt nuk janë të rëndësishëm vetëm për Shqipërinë dhe fqinjët e saj por edhe për sigurinë globale që përfshin edhe SHBA.

Angazhimi i qeverisë së SHBA për forcimin e ligjzbatimit në Shqipëri është këtu tani dhe do vazhdojë të jetë këtu gjithmonë. Ky angazhim është i palëkundur. Dhurimi i pajisjeve është dëshmi e saj.  Ju nuk jemi vetëm në këtë fushë. Punojmë ngushtë me Greqinë. Mbrojtja e kufijve nga qarkullimi i armëve dhe drograve është thelbësore për sigurinë rajonale.

Arrestimet e fundit në kufi janë tregues i mirë që pajisjet që kemi dhuruar janë efikase. Trafikimi i armëve, tregtinë e narkotikëve drejtohen nga element kriminalë të zgjuar dhe të pamëshirshëm. Duhet të jemi pak më të zgjuar dhe më të pamëshirshëm. I nxisim agjencitë të punojnë krah për krah kundër trafikimit të paligjshëm dhe formave të tjera të krimit. SHBA do vazhdojnë qëndrojnë krah jush përballë krimit gjithnjë në zhvillim”, u shpreh Kim.