Yuri Kim: Zgjedhjet e 25 prillit nuk ishin perfekte, të gjithë e dinë këtë!

Ambasadorja amerikane, Yuri Kim, dha një mesazh të qartë se tani është koha më e përshtatshme për të ndërmarrë hapat e nevojshëm për të mundësuar votën e diasporës.

Në një aktivitet të zhvilluar nga KQZ, Kim solli në vëmendje rikthimin e opozitës në Parlament, që sipas saj ishte diçka e rëndësishme në zgjedhjet e kaluara.

Sipas saj, zgjedhjet e 25 prillit ishin të mira, por jo perfekte, ndërsa nxiti më shumë palët politike për të punuar që të mundësojnë votën e emigrantëve.

“Akti i mbajtjes së zgjedhjeve është një demonstrim i forcës. Zgjedhjet parlamentare të 2021 shënuan një ngjarje vendimtare siç ishte rikthimi i opozitës në Kuvend.

Zgjedhjet e 25 prillit ishin të mira, por nuk ishin perfekte. Të gjithë e dinë këtë. SHBA mirëpresin takime të tilla për të adresuar problemet në zgjedhje, përfshirë edhe mungesën e votës së diasporës. Ne nxisim bashkëpunimin që zgjedhjet e ardhshme të përmbushin standardet.

SHBA do mbështesin reformat për Shqipërinë, qoftë atë të drejtësisë, qoftë atë zgjedhore”, tha Yuri Kim.