Zëvendëskryeministri Arben Ahmetaj: 230 apartamente në 9 blloqe banimi gati në Manzë

Zëvendëskryeministri Arben Ahmetaj, i shoqëruar nga Kryetarja e Bashkisë Durrës Emiriana Sako, inspektuan sot përfundimin e punimeve në lagjen e re të Manzës, ku janë ndërtuar 9 blloqe banimi me rreth 230 apartamente, të cilat në ditët në vijim do t’u shpërndahen banorëve, sipas shortit të organizuar.

“Kjo është një nga zonat më të dëmtuara nga termeti i 26 nëntorit 2019. Kjo lagje e re sot, tregon se ai premtim që bëmë dy vite me parë, është bërë realitet”- tha Ahmetaj.

“Në qytetin e Durrësit ka mbaruar një numër i madh pallatesh, rikonstruksion dhe ndërhyrje strukturore. Në krye të 7-8 muajve s’do kemi asnjë shenjë të tërmetit në territorin e Durrësit”, tha zëvendëskryeministri.

Në zonën e Manzës vijon puna edhe për 236 banesa individuale, ndërsa 140 prej tyre iu janë dorëzuar tashmë familjeve.