Zgjedhje të parakohshme? Spiropali-Bashës: Prisni 2021 për t’u kthyer në Kuvend

”Lulzim Basha dhe shumica e tij imagjinare duhet të presin zgjedhjet e radhës për t’u rikthyer në Parlament”, këtë mesazh jep ministrja për Marrëdhëniet me Parlamentin, Elisa Spiropali, përmes një postimi në facebook, pas thirrjeve të opozitës për zgjedhje të parakohshme. ”Ata që e grisën kontratën me zgjedhësit e tyre, nuk kanë asnjë të drejtë po as edhe një shans gjithashtu, të grisin kontratën tonë”. Ministrja thotë se qeveria po përgatitet për dy sezone të reja betejash, ndërsa bën me dije se brenda dhjetorit do votohet Reforma Zgjedhore.

Postimi i plotë

Lulzim Basha dhe shumica e tij imagjinare duhet të presin zgjedhjet e radhës për t’u rikthyer në Parlament, prej ku u larguan vullnetarisht me daullet e fitores imagjinare!

Qeveria dhe shumica jonë e votuar për të qeverisur 4 vjet, kanë shumë detyra e punë për të realizuar deri në përfundim të mandatit, në respekt të kontratës me shqiptarët. Ata që e grisën kontratën me zgjedhësit e tyre, nuk kanë asnjë të drejtë po as edhe një shans gjithashtu, të grisin kontratën tonë.

Ne po përgatitemi për dy sezone të reja betejash në çdo drejtim dhe për një Shqipëri më të mirë në çdo fushë të jetës. Nga ana tjetër, sa më shumë Lulzim Basha dhe shumica e tij imagjinare refuzojnë dialogun për reformën zgjedhore, aq më pak kohë kemi ne për të humbur me ta.

Brenda dhjetorit do te votojme Reformën Zgjedhore sipas rekomandimeve të OSBE/ODIHR dhe do të vazhdojmë më tej me pikat kyçe të procesit të integrimit europian, duke përdorur si hartë drejtuese rezolutën e Bundestagut, si edhe të gjitha pikat e tjera të programit tonë për Shqipërinë që duam.