Zgjedhjet e së dielës për kandidatët në primare, Berisha: Ditë historike, bëni zgjedhjen më të mirë

Të dielën do të mbahen zgjedhjet e procesit të primareve, nga ku do të dalin kandidatët e PD-së për zgjedhjet lokale të 14 majit 2023. Sali Berisha përmes një videomesazhi për demokratët, e cilëson 4 dhjetorin si ditë historike për PD dhe gjithë Shqipërinë, ndërsa shton edhe se demokratët janë të lirë të zgjedhin kandidatin që preferojnë për përfaqësim në zgjedhet lokale.

“Dy ditë na ndajnë nga evenimenti më i madh pas themelimit të partisë Demokratike deri sot, votimi për kandidatët, për qytetarët e parë të bashkive të vendit të cilët garuan gjatë kësaj periudhe dhe presin me pa durim votën tuaj, besimin tuaj, pjesëmarrjen tuaj, në procesin zgjedhor të datës 4 dhjetor dhe që zhvillohet në mbarë vendin.

Duke ju falënderuar me shumë mirënjohje, anëtarëve, simpatizantëve dhe të gjithë kandidatëve që morën pjesë në garë, drejtuesve të partisë, grupseksioneve dhe seksioneve, u bëj thirrjen më miqësore, të bëni gjithçka për një proces dinjitoz që ju jep ju, Partisë Demokratike dhe shoqërisë shqiptare shumë nder, që zgjeron dhe konsolidon liritë tuaja, për votimin në primare më datën 4 dhjetor.

Pjesëmarrja juaj është një kontribut i veçantë. Unë e di që keni bërë shumë punë, por tani jeni të ftuar të flisni, të firmosni me votën tuaj për kandidatin më të mirë që ju besoni, që ju mendoni. Kam besim të madh se do ta shndërrojmë këtë ditë të një rëndësie historike jo vetëm për PD, por për Shqipërinë”, tha Berisha.