Zgjerimi i Greqisë, Shehu: Duhet transparencë! Marrëveshja e 2009-ës, më e mira dhe më e favorshmja

Në një intervistë Skype për RTV Ora, ish ministri i jashtëm demokrat Tritan Shehu ka komentuar dekretin e Greqisë për zgjerimin me 12 milje në Detin Jon, edhe pse dy muaj më parë, gjatë vizitës në Tiranë të kryediplomatit të Athinës u ra dakord që çështja e detit të zgjidhej në drejtësinë ndërkombëtare.

Sipas Shehut, politika rajonale e Ramës ka qenë një dizastër, ndërsa u shpreh se marrëveshja e vitit 2009 ishte më e mira për të dyja vendet.

“Për të arritur në një mendim të qartë duhet parë rrjedha e ngjarjeve. Politika rajonale e kësaj Rilindjeje ka qenë një dizastër e vërtetë, që nga viti 2013. Me një çmim të lartë të paguar nga Shqipëria, për rolin e saj në rajon, për humbjen e vendit lider që ka patur Shqipëria në rajon deri në atë periudhë për stabilitetin e rajonit, për arritjen e asaj që ka synuar gjithmonë Vuçiç. Për projektet e rrezikshme, jo vetëm për Shqipërinë por edhe për shqiptarët, siç është ai i shkëmbimit të territoreve mes Kosovës dhe Serbisë. Apo siç është projekti i Jugosllavisë së Re që, Rama, Thaçi, Vuçiç hodhën në treg, për të lënë mënjanë Kosovën dhe për të vendosur një dominim serb në zonë.

Të tilla kanë qenë marrëdhëniet e Ramës me Greqinë, jo që në 2013, por që kur ishte në opozitë. Ka qenë realisht një politikë aventureske, një politikë e cila ka qenë plotësisht e pastabilizuar, një politikë që synonte të shkatërronte marrëdhëniet e mira, të ngushta, strategjike .

Për qëllim të të tjerëve, Rama sulmoi marrëveshjen e arritur nga qeveria Berisha dhe qeveria greke, e Samaras, në atë periudhë, për kufijtë detarë, që ishte një marrëveshje absolutisht racionale, që ishte brenda të gjitha parimeve ndërkombëtare dhe marrëveshja më e mirë për të dy vendet do të thoja“, u shpreh Tritan Shehu.

Dhe në fund, Shehu ngre disa pyetje:

“Duhet transparencë! Çfarë ka në këtë mes? Pse u ra dakord tani për një temë që ishte diskutuar në kushte më të favorshme për Shqipërinë? Pse u anatemua atëherë ajo marrëveshje (e 2009) që ishte më e mira dhe më e favorshmja? Pse u godit vullneti dypalësh për ta çuar marrëveshjen në Gjykatën Ndërkombëtare të Hagës? Dhe sot kërkohet të bëhet e njëjta gjë, në kushte më të disfavorshme, pa dhënë asnjë shpjegim nga qeveria Rama?“