Zjarri në shkollën 9-vjeçare, ministrja Kushi: Organet kompetente të zbardhin ngjarjen

Këtë të martë shkolla 9-vjeçare “5 Shkurti” në Mallakastër u përfshi nga flakët, të cilat shkaktuan dëme materiale. Ministrja e Arsimit, Evis Kushi kërkon nga organet kompetente që të zbardhin ngjarjen, edhe pse nga të dhënat e para dyshohet që shkak të jetë bërë një shkëndijë elektrike. Po ashtu Kushi thekson se po punohet që shkolla të jetë gati më 5 janar, kur rinis procesi mësimor.

“Po ndjekim nga afër me vëmendje zhvillimet në lidhje me ngjarjen e ndodhur në shkollën 9-vjeçare “5 Shkurti” në Mallakastër, ku si pasojë e zjarrit në njërën prej klasave janë shkaktuar dëme fizike dhe materiale.

Sipas informacioneve zyrtare paraprake, shkak i zjarrit ka qenë një shkëndijë elektrike, por megjithatë kërkoj nga organet kompetente, jo vetëm Policia e Mallakastrës por edhe Bashkia, si institucioni përgjegjës për sigurinë e shkollës, që të bëjnë sa më parë një hetim të plotë të shkaqeve që çuan në këtë incident.

Falënderoj veçanërisht punonjësit e zjarrfikëses dhe personelin e shkollës, të cilët kanë ndërhyrë në kohë rekord, duke parandaluar përhapjen e zjarrit në klasat e tjera.

Dëshiroj të informoj opinionin publik se po marrim të gjitha masat, në bashkëpunim me Bashkinë dhe Zyrën Arsimore Mallakastër, që shkolla të jetë gati për të pritur nxënësit ditën e enjte, më datë 5 janar, kur rinis procesi mësimor në të gjitha shkollat e vendit”.