”Zoto ndodhet në Vlorë”, Berisha nxjerr foton e makinës: Mërtirit iu refuzua azili në Vjenë

Sali Berisha vijoi denoncimet për atë që e quan aferën e shekullit. Ai tha se ka njohuri për vendndodhjen dhe aktivitetin e pronarëve të inceneratorëve, Mirel Mërtiri dhe Klodian Zoto, ku për këtë të fundit tha se ndodhet në Vlorë dhe shëtit i lirë.

“Mirel Mërtiri që ndodhet në Vjenë dhe ka kërkuar azil politik ka kaluar gjykimin në Gjykatën e Shkallës së parë në Vjenë dhe gjykata ia ka refuzuar azilin politik Mirel Mërtit. Qeveria po i përgatit pasaportën atij në mënyrë që ai të ja mbathë atje ku janë një pjesë e mirë e parave, në Zimbabve. Zoto rrezatohet, bronzohet mirë e bukur në Vlorë. Dhe në dispozicion të Klodian Zotos, ua them me përgjegjësi të plotë, nga persona që nuk u shpëton gjë, kjo është vetura me të cilën shëtit Klodian Zoto dhe e kujt është thoni ju, është e ‘Integrate Energy’ që tani e ka agjencia shtetërore e mbikëqyrjes së djegësit të Tiranës”,-tha Berisha.

Pasi humbi zgjedhjet lokale të 14 Majit, Sali Berisha tha se do të votëbesohet në Kuvend, ashtu siç e përcakton statuti i Partisë Demokratike. Kur kanë kaluar 3 muaj nga zgjedhjet vendore, Berisha ka bërë me dije se nuk do të votëbesohet në Kuvend, por ka dalë me një tjetër tezë. Për Berishën, qëndrimi i tij ose jo në krye të Partisë Demokratike, do të vendohet me anë të një referendumi, mirëpo nuk ka asnjë datë konkrete se kur do të ndodhë kjo.