Zv. Ministrja e Mirëqenies Sociale, Gentiana Sula për të humburit e diktaturës

Zv. Ministrja e Mirëqenies Sociale, Gentiana Sula, ka deklaruar se janë rreth 6 mijë persona të cilët rezultojnë të zhdukur nga periudha e diktaturës dhe se brenda muajit maj do të shpërndahet kësti i katërt dhe i pestë i ndihmave për familjet e këtyre personave.  Pranë institucionit të ish-të përndjekurve politikë janë hapur disa zyra për këta persona në të cilat do të ketë një databazë të saktë me të gjithë personat e humbur në atë periudhë. Në këtë nismë të marrë nga Ministria e Mirëqenie Sociale do të japë një kontribut të veçantë edhe Komisioni për Personat e Zhdukur në Botë. Përfaqësuesi i këtij komisioni, Metju Holiday e vlerësoi ftesën e ministrit të mirëqenies. Ai u shpreh  se të gjithë familjarët e viktimave të periudhës së diktaturës kanë të drejtë të dinë të vërtetën, kanë të drejtën e drejtësisë, kanë të drejtën për dëmshpërblim qoftë edhe simbolik, duke theksuar se është shumë i rëndësishëm edhe kontributi i të gjithë familjarëve të viktimave. “Ne nxisim qeveritë që të miratojnë ligjet dhe të zhvillojnë këtë proces. Kemi eksperiencë në ish-Jugosllavi. Në Ruada apo edhe në Afrikën e Jugut. Por siç e thashë familjarët e viktimave kanë rol të rëndësishëm. Ne japim edhe ndihmë teknike, me pajisje që zbulojnë zonat ku mund të jenë mbetje të trupave”, ka thënë ndër të tjera përfaqësuesi i Komisionit për personat e zhdukur në botë, Metju Holiday.