Zv/ministri kundra kryeministrit :” Kauçuku tek hyrja e kryeministrisë e gabuar”

Streha me drita, e vendosur në hyrje të kryeministrisë, nuk është kundërshtuar vetëm nga mbrojtës të trashëgimisë kulturore (përjashto dy Artanët e kryeministrit) apo opinionistë. Kundër saj tani ka dalë hapur edhe LSI. Një esksponent që LSI e përdor sa herë nuk pajtohet me aleatët e ka quajtur atë “një strehë kauçuku të tmerrshme”. Zv.ministri i Transportit, Ylli Manjani, njëherazi nënkryetar i LSI-së, shprehet se “ajo streha e kauçukut që është ndërtuar në fasadë është e tmerrshme! Nuk është as estetike e as ligjore”. Nënkryetari i LSI dhe anëtari i kabinetit qeveritar nuk ndalet me kaq. “Baza e sotme ligjore ndalon ndërhyrjen në objektet e mbrojtura (ndërtesat e bulevardit janë të mbrojtura tashmë). Kështu që, kushdo që mund të ketë dhënë leje, ka gabuar rëndë! Estetikisht, vendosja e kauçukut si strehë e ka prishur fasadën origjinale. Ato mbajtëset që kalojnë përmbi ballkon, që ngjajnë si mbajtëse mbikalimi, plus plastika, e bëjnë atë hyrje të shëmtuar. Ajo strehë sikur u bë për të pritur Lady Gaga­n dhe jo Angela Merkelin”, thotë ai në një intervistë për GSH. Por kështu ai kritikon një tjetër projekt të kryeministrit, atë për hyrjen e re të parkut të liqenit, duke thënë se LSI nuk dëshiron që të preket as edhe një fije bari.