Ana Brnabić – eksperte e parrezikshme

Ekzistojnë disa shkaqe pse Vuçiqi ka propozuar këtë eksperte për kryeministre, shpjegon analisti Branko Radun. „Me zgjedhjet e një personi jashtë partive politike për kryeministër, Vuçiqi ka evituar turbulencat e shumta partiake në partinë e tij, por edhe tek socialistët në koalicion. Brenda partisë së tij ka pasur shumë kandidatë që kanë pretenduar këtë post, ndërkohë edhe lideri i socialistëve Ivica Daçiq ka shpresuar se sërish do të kthehet në postin e shefi të ekzekutivit. Ndërkohë që mendohet se një femër e kalibrit të këtillë do të ketë një komunikim shumë më të mirë me Perëndimin”, mendon Radun.

Shteti serb

Me zgjedhjet e ekspertëve mundësohet zgjidhja më e lehtë e problemeve, sepse zgjidhja e tyre nuk varet prej klaneve politike, pohon Radun. „Por kryeministren e re e presin vendime shumë të rënda“. Ndaj shtrohet pyeta si është e mundur që një politikane pa përvojë të zgjidhë këto probleme të rënda? Branko Radun thotë se Ana Brnabić do të mbështetet nga autoriteti i Vuçiqit, por ai nuk është optimist i madh se kjo do ta ndihmojë tepër për zgjidhjen e problemeve.

„Klanet e mëdha politike dhe ajo që quhet problem i shtetit të Serbisë do të jenë problem, sepse Serbinë e presin reforma të mëdha në ushtri, shërbimet e sigurisë dhe në ekonomi. Ndërkohë që në Serbi kemi një sistem të klaneve që funksionon gjithandej. Ana Brnabić do ta ketë mbështetjen e Vuçiqit por nuk dihet nëse kjo do të mjaftojë“.

Figura politike

Mendoj se Vuçiqi ka vendosur për Brnabić edhe për të evituar konkurrencën e mundshme nga ndonjë kryeministër i fuqishëm, mendon analisti Dragoljub Petroviq, kryeredaktori i gazetës Danas. „Ana Brnabić nuk mund t’ia marrë partinë Vuçiqit, siç ka bërë ai me ish-kryetarin e SNS, Tomisllav Nikoliq“.

Nga ana tjetër, shtrohet edhe çështja e autoritetit të saj, sepse në kabinetin qeveritar do të ketë shumë politikanë me përvojë dhe autoritet. Dragoljub Petroviq mendon se Brnabić do ta ketë shumë të vështirë. “Në qeveri do të ketë jo vetëm politikanë me përvojë por edhe lojtarë të ndyrë politikë, të cilët janë besnikë ndaj Vuçiqit. Ndaj besoj se kryeministrja do të ketë shumë më pak pushtet se Vuçiqi“.

SNS e mbizotëruar nga Vuçiqi

Mediat serbe kanë dhënë vlerësime të ndryshme në kohën para bërjes publike të emrit të kryeministres së re. Është thënë madje se Ivica Daçiqi do të rrëzojë qeverinë, në rast se nuk bëhet kryeministër. Branko Radun mendon se SNS do të jetë e pakënaqur, për shkak se mandati i është besuar një personi jashtë partisë. Megjithatë Radun nuk pret ndonjë tensionim të madh, për shkak të autoritetet të Vuçiqit. Vuçiqi do të humbë mbështetjen e opinionit konservator për shkak të orientimit seksual të kryeministres (lezbike), por do të fitojë mbështetjen e opinionit liberal.

Orientimi seksual i Ana Brnabić do të jetë temë e trajtuar gjatë tërë mandatit të saj. Në disa media thuhet se kjo përzgjedhje e Vuçiqit do të ketë efekt të mirë marketingu. Presidenti është mjeshtër i marketingut, thotë Dragoljub Petroviq. „Ai e di që përzgjedhja e tij nuk do t’i pëlqejë shumë zgjedhësve në Serbi, por do të pëlqehet nga shumë partnerë perëndimorë. Ndërsa sa i përket Rusisë, mbështetja do të forcohet pasi të vijnë në Serbi Migët e parë nga ky vend. Pra kemi një lloj politik,e ku secili do të gjejë ndonjë shkas për të mbështetur Vuçiqin dhe qeverinë, që punën e mbështet si tek LGDP edhe tek Migët.”.

E re, lesbike dhe besnike – kryeministrja e re e Serbisë

Një “eksperte e pavarur”, lesbike dhe besnike e presidentit Vučić në krye të qeverisë në Serbi.

Ana Brnabić, ish-ministrja për Administratën Publike dhe Komunat do të jetë kryeministja e re e Serbisë.

Brnabić ka studjuar marketing në Universitetin Northwood në Michigan dhe Universitetin Hull në Angli. Pas studimeve 41-vjeçarja Brnabić ka punuar në disa projekte të BE-së dhe të Agjencisë Amerikane USAID në Serbi. Pas kësaj, ajo ishte drejtore e kompanisë amerikane Continental Wind Serbia (CWS), që merret me zhvillimin e parqeve me mullinj ere për përfitimin e energjisë elektrike. Përveç gjuhës angleze, ajo flet rrjedhshëm dhe rusisht.

Brnabić nuk i përket asnjë partie politike dhe është “eksperte e pavarur”, gjë që konsiderohet si cilësi më vete në radhët e serbëve që janë të ngopur dhe të pakënaqur me politikanër dhe politikën.

Shumë vëzhgues mendojnë se ajo është e re dhe “cool” por se nuk ka shumë ndryshime nga pasuesit e tjerë të Vučić-it. Ajo vetë e lëvdon pa ndërprerje Vučić-in si reformator dhe konsiderohet si besnike e tij.