Daçiç flet për krijimin e ushtrisë së Kosovës: Me rëndësi hapja e dyerve për dialog

Ministri i Jashtëm serb, Ivica Daçiç, ka thënë se Shtetet e Bashkuara e kanë ndryshuar politikën ndaj dialogut midis Kosovës dhe Serbisë, por nuk pritet të tërheqin njohjen ndaj Kosovës.

Shefi i diplomacisë serbe, Daçiç, tha në një televizion serb se nuk është gjithçka “bardh e zi” dhe se, sipas tij, më e rëndësishmja është se Serbisë po i hapen dyert për dialog.

“Ata [SHBA] nuk do të ndryshojnë politikën në aspektin e njohjes së Kosovës, por nuk është gjithçka bardh e zi. Nuk pres që do të përfundojë gjithçka në këtë mënyrë, kur bëhet fjalë për ushtrinë e Kosovës. Gjëja më e rëndësishme është se po hapen dyert për dialog, sepse para disa muajsh, Shtetet e Bashkuara kishin një qëndrim se nuk kishte për çfarë të flitej”, tha Daçiç, duke folur për procesin e formimit të ushtrisë së Kosovës.

Daçiç gjithashtu komentoi letrën e ish-ambasadores amerikane në OKB, Nikki Haley, dërguar Sekretarit të Përgjithshëm të OKB-së, përmes së cilës kërkon tërheqjen e UNMIK-ut nga Kosova.

“Amerika mund të shkruajë sa të dojë, por nuk ka ndryshim të Rezolutës 1244 derisa të mos pajtohet për këtë Këshilli i Sigurimit. Meqenëse nuk ka konsensus, kjo nuk do të ndodhë”, tha Daçiç.