Daçiç: Sovraniteti i dyfishtë në veri të Kosovës, i papranueshëm

Ministri i Punëve të Jashtme në Serbi, Ivica Daçiç, ka deklaruar se ideja për sovranitet të dyfishtë në veri të Kosovës, është një gjë e papranueshme për Serbinë. Një gjë të tillë shefi i diplomacisë serbe e deklaroi gjatë një interviste në RTS, ku edhe ka komentuar takimin e 29 prillit në kryeqytetin gjerman. Daçiç tha se ftesa e Francës dhe Gjermanisë për një takim të tillë ka shkaktuar jo pak habi në Bruksel, ndërsa shton se disa vende kanë mbetur të pakënaqura që nuk janë ftuar.

“Ky takim është thirrur dhe ka habitur edhe Brukselin pasi nuk është pjesë e aktiviteteve, por ka edhe shtete të cilat janë të pakënaqura që nuk janë ftuar edhe pse janë pjesë e procesit të Berlinit, si p.sh Austria dhe Italia”, ka thënë Daciç.

Ndër të tjera, Daçiç tha se në Berlin nuk pritet të ketë ndonjë propozim për zgjidhje, por vetëm një presion i mëtejshëm mbi Beogradin dhe Prishtinën që të vazhdojnë bisedimet në Bruksel.

“Për të vazhduar dialogun është e nevojshme të hiqet taksa. Kjo është kërkesa jonë. Ndoshta do të ketë presion për të vazhduar, që të kthehemi në dialog”,  është shprehur ai.