Dhuna në Maqedoni – Asnjë proçedim për deputetët e VMRO-së që hapën dyert e Kuvendit

Prokuroria maqedonase nuk ka nisur ende asnjë proçedim penal për deputetët e VMRO-DPMNE, të cilët dyshohet se ndihmuan protestuesit të futeshin në brendësi të godinës së Kuvendit, pavarësisht pamjeve të shumta që duket se vërtetojnë diçka të tillë. Organi i akuzës ka bërë të ditur se është ende në proçesin e analizimit të materialeve që janë grumbulluar dhe se po mundohet që të bëjë identifikimin e personave që janë përfshirë në këtë çështje.

Pavarësisht se në Prokurori kanë mbërritur prej ditësh pamjet në të cilat duket se shtatë deputetë të partisë VMRO-DPMNE ndihmuan protestuesit e dhunshëm që të futeshin në Kuvend pas zgjedhjes së kryeparlamentarit, Talat Xhaferrin, organi i akuzës maqedonase nuk ka nisur ende asnjë proçedim penal për përfaqësuesit e partisë konservatore.

Mediat kanë kërkuar të dhëna për këtë proçes hetimor, por Prokuroria ka bërë të ditur se po merret ende me identifikimin e personave që mund të dallohen në pamjet filmike.

Zyrtarët e çështjes shtojnë se pas analizimit të materialeve, mund të thirren persona të tjerë për të dëshmuar dhe vetëm pas këtij proçesi mund të ketë proçedim penal.

Mbështetja e deputetëve të VMRO-së për protestuesit e dhunshëm ka shkaktuar një debat të gjerë në Maqedoni, ndërsa veprimi është dënuar ashpër.

Në materialin filmik që është publikuar së fundmi nga mediat, dy deputetët e VMRO-së Sashe Vasilevski dhe Kërste Mukoski dallohen duke vrapuar për të hapur dyert e Kuvendit.

Atyre ju bashkua edhe një i punësuar si sigurim i Kuvendit i cili afrohet tek porta.

Pranë hyrjes mund të dallohet edhe Goran Gjosheski, shef i sigurimit të ish-kryeparlamentarit Trajko Veljanovski.

Megjithatë, bëhet e ditur se ekzistojnë edhe pamje të tjera, ku dallohet qartë se edhe deputetë të tjerë të VMRO-së kanë ndihmuar demonstruesit për t’u futur në godinën e Kuvendit.