Do ketë marrëveshje Kosovë-Serbi? Kurti: Unë jam nxënësi i Demaçit, ndërsa Vuçiç i Sheshelit

Marrëveshja Kosovë-Serbi nuk shihet e afërt. Në një interviste për televizionin boshnjak N1, kryeministri Albin Kurti renditi disa nga arsyet se përse e sheh të vështirë arritjen e një marrëveshje mes Kosovës dhe Serbisë në një kohë të shkurtër.

“Aleksandar Vuçiç, presidenti i Serbisë sot, është student politik i Vojisllav Sheshelit. Ndërsa unë, si Kryeministër i Republikës së Kosovës, unë jam student politik i Adem Demaçit.

Dhe ky ballafaqim, kjo përplasje ndërmjet Kryeministrit të Kosovës dhe presidentit të Serbisë, është në një mënyrë thelbësore, përplasje ndërmjet Adem Demaçit, atij vizioni dhe asaj trashëgimie dhe Vojisllav Sheshelit në anën tjetër.

Ndaj unë e pranoj që marrëveshja mes Kosovës dhe Serbisë nuk do të jetë e lehtë, por megjithatë mendoj që duhet t’i jepet shans dialogut dhe të shpresojmë e të punojmë për më mirë”, u shpreh mes të tjerash Kurti.