Kurti dhe Vuçiç në Bruksel takojnë veçmas me Borrell dhe Lajçak. Raundi i parë shumë pozitiv

Raundi i ri i dialogut mes Prishtinës dhe Beogradit me ndërmjetësimin e Brukselit, ka nisur me një atmosferë shumë pozitive. Kryeministri i Kosovës, Albin Kurti, ishte i pari që zhvilloi një bisedë bilaterale me përfaqësuesin e lartë të BE-së për politikë të jashtme, Joseph Borrel dhe ndërmjetësuesin, Miroslav Lajçak.

Temë kryesore diskutimi ka qenë takimi i nivelit të lartë dhe propozimi evropian për normalizimin e marrëdhënieve. Menjëherë pas Kurtit, në tryezën katrore zuri vend presidenti I Serbisë, Aleksandër Vuçiç.

Edhe biseda e tij me zyrtarët e BE-së pati të njëjtën temë, pranimin e propozimit evropian si kornizë për marrëveshjen përfundimtare. Kjo do të pasohet nga takimi më i rëndësishëm, ku përballë do të vihen në të njëjtën tryezë, kryeministri Kurti dhe presidenti Vuçiç.

Në Bruksel gjendet edhe i dërguari i posaçëm i Shteteve të Bashkuara për Ballkanin Perëndimor, Gabriel Escobar. Deri tani nga palët negociuese nuk ka ndonjë deklaratë për mediat, por më herët kreu i qeverisë së Kosovës kërkoi që një ujdi me njohje reciproke të arrihet brenda këtij viti.