Qeveria greke rrit limitin e tërheqjeve nga depozitat bankare

Qeveria greke ka njoftuar një lehtësim tjetër në qarkullimin e kapitaleve bankare të qytetarëve.

Që nga qershori 2015, qytetarët nuk kanë lirshmëri në tërheqjen e parave nga depozitat e tyre, por ata mund të tërhiqin vetëm një sasi të caktuar, që aktualisht shkon deri në 840 euro në dy javë.

Masa, që ka marrë emrin kontroll i kapitaleve (capital controls), u vendos me qëllim që të përmbante rrjedhjen e parave nga bankat greke, pak ditë para referendumit të 5 korrikut 2015. Në ato ditë rrezikohej qëndrimi i Greqisë në euro dhe njerëzit ishin përfshirë nga paniku. Për shumë muaj, qytetarët nuk mund të tërhiqnin vepse 60 euro në ditë nga depozitat e tyre bankare.

Tashmë, ata mund të marrin përnjëherë nga 1.800 euro në muaj. Por me kusht që gjatë muajit të mos jenë bërë tërheqje të tjera.

Vendimi i firmosur nga ministri i financave, do të hyjë në fuqi më 1 shtator.

Ky lehtësim i ri interpretohet nga qeveria si një tjetër shenjë pozitive në krizën ekonomike dhe financiare që ka përfshirë Greqinë prej 7 vjetësh.

Muajin e kaluar Greqia emetoi obligacione shtetërore, për herë të parë pas tre vjetësh. Ndërsa të enjten, Banka Qendrore Europiane reduktoi limitin e kreditimit të bankave greke me likuiditete emergjence.