Qytetarët në Kosovë solidarizohen me popullin turk, ka filluar grumbullimi i ndihmave

Solidar me të prekurit nga tërmeti shkatërrues në Turqi dhe Siri, po tregohen edhe qytetarët e Kosovës. Përmes një organizate kulturore turke në Prishtinë, ka filluar grumbullimi i ndihmave të ndryshme për qytetarët turq që pësuan nga lëkundjet e tokës.

Gatishmëria e qytetarëve për të kontribuar, sipas organizatorëve është shumë e madhe. Jëlldëraj Bajrami, organizator i aksionit për mbledhjen e ndihmave tregon se me ndihmën e vullnetarëve, kryesisht nxënës të shkollave po bëhet seleksionimi dhe paketimi i ndihmave ndërsa shpërndarja bëhet nga organizatat në Turqi.

Po mblidhen edhe para nga qytetarët e Kosovës. Qytetarët nga ana tjetër tregojnë se e kanë përjetuar rëndë dhe po mundohen të ndihmojnë me mundësitë e tyre. Aksioni i mbledhjes së ndihmave do të vazhdojë deri të shtunën.