Solidaritet me Prishtinën, Tirana në protestë për abuzimin e 11-vjeçares: Stop heshtjes

Në mbështetje të protestave që po mbahen në Prishtinë pas ngjarjes kriminale të abuzimit seksual të 11-vjeçares nga 5 burra, në sheshin ”Nënë Tereza” po mbahet një protestë.

Me pankartat ”Unë bërtita Joooooo”, ashtu siç e mitura u shpreh në dëshminë e saj në Prishtinë dhjetëra qytetarë të solidarizuar po luftojnë në shesh, të gjithë bashkë për edukimin e një shoqërie patriarkale. Të pranishme janë edhe figurat publike, si artistët: Fifi, Beatrix Ramosaj, Monika Lubonja, Anxhela Peristeri apo Evi Reçi.

Këngëtarja Beatrix Ramosaj, mban një pankartë bazuar në frazën që u bë meme gjatë qëndrimit të saj në ”Big Brother Vip Albania”. “Si thuhet n’shqip Jo domethënë Jo”, shkruhet në pankartë, ndërsa pjesa më e madhe e protestuesve mbajnë të veshur bluze me shkrimin “Unë bërtita Joooo”.

Gazetari Ermal Peçi, kërkoi një duartrokitje në kor për vajzën, për të cilën tha se është dashuria jonë e përbashkët. “Ky vend është kaq i bukur falë ush dhe mendoj që të gjithë të bëhemi burra, t’i përulemi grave e vajzave. Për horrat që janë në burg e mos dalshin kurrë dhe që fatkeqësisht do të dalin, një duartrokitje në kor për atë vajzë që është dashuria jonë e përbashkët, është një shenjë që nuk është vetëm. Ti je me ne. Ne të duam shumë”, tha Ermal Peçi.

Aktivistja Zhaklin Lekatari tha se ”Nuk përdhunon veshja, por mendja”, si kundërpërgjigje e të gjithë atyre të cilët jo vetëm që nuk e mbrojtën dhe përkrahën qoftë edhe virtualisht të miturën por guxuan edhe ta kryqëzonin.