Vrasja e gruas shtatzënë/ Kryeministri Kurti: E papranueshme, dy engjëj në qiellin e pistë

Për vrasjen tragjike ka reaguar edhe kryeministri i Kosovës, Albin Kurti. Në një mesazh në rrjetet sociale, ai e ka cilësuar të papranueshme vrasjen e gruas shtatzënë në derë të spitalit nga ish-bashkëshorti i saj.

“Dy engjëj në qiellin e pistë. Vrasje mizore. U vra edhe një grua. Edhe kjo nga burri i saj. Në oborr të spitalit. Atje ku duhet të shërohen njerëzit. Në oborr të Klinikës Gjinekologjike. Atje ku lindin gratë.

U shua një jetë që po sillte edhe një jetë tjetër. Gruaja ishte shtatzënë. Rreth 35 vjeç, as në gjysmë të jetës së saj. E fëmija që ajo donte ta lindte as nuk e filloi jetën. Vrasës mizor. Edhe një burrë që qëllon mbi gruan që duhej ta mbronte. Edhe një burrë që vret një grua. E cila tash është e jona, e të gjithë neve.

Bashkë me foshnjën e palindur të saj. Dy qytetarë të Kosovës më pak, dy shqiptarë më pak, do të jenë duke menduar armiqtë tanë. E papranueshme dhe e padurueshme”.