Banorët e ”Big Brother” mësojnë për sulmin terrorist mbi Top Channel, Arbana: Jemi në ditë zie

Sonte Prime në ”Big Brother Albania Vip 2” nisi ndryshe për herë të parë. Në studio nuk ka publik, pa ish-banorë dhe pa muzikë. Arbana e nisi me një monolog mbi atë që tronditi opinionin publik shqiptar pas sulmit terrorist ndaj Top Channel.

”Sot nuk kemi dot spektakël”,-u shpreh Arbana në nisje të emisionit në këtë moment të vështirë. Moderatorja theksoi se media Top Channel është në zi dhe se do të jetë në dorën e banorëve që të vendosin për rrugëtimin e tyre.

“Është detyra jonë të ndajmë me ta se çfarë ka ndodhur dhe të kërkojmë prej tyre të reflektojmë e të marrin një vendim nëse do ta vazhdojnë apo jo këtë rrugëtim. Nuk është e thjeshtë të ndash lajme të këqija por është një nga momentet më të vështira, ndjejmë se është e domosdoshme kështu ne sot, jemi gati t’a themi banorëve atë çfarë ka ndodhur dhe bashkë me Arbrin e Zhaklinën të shpresojmë që ata të vendosin të vazhdojnë këtë rrugëtim”,-tha Arbana. E me pas sqaroi se çfarë ka  ndodhur në Top Channel.