“Edhe nëse do të lind, sërish dua të adoptoj një fëmijë”, ja rrëfimi i sportistes së njohur

Klodina Shala e ftuar në emisionin, Rudina rrëfeu për sportin, për biznesin e saj, por gjithashtu tregoi edhe për një deklaratë të bërë kohë më parë në media televizive, për adoptimin e një fëmije.

Pak muaj më parë, atletja e famshme shqiptare Klodiana Shala rrëfeu në një emision se disa vite më parë, kishte dashur të adoptonte një fëmijë nga “Shtëpia e Fëmijës”, por nuk ia kishte dalë dot pasi nëna e tij nuk e kishte lejuar një gjë të tillë.

Shala ka folur më gjatë për këtë çështje gjatë ditës së sotme, ku tregoi se çfarë kishte ndodhur në të vërtetë.“Ishte viti 2003-2004 dhe unë sa kisha filluar të shkoja tek ‘Shtëpia e Fëmijës’. Më tërhoqi një fëmijë sy blu, biond ishte fiks sikur ta kisha lindur unë. Ai ishte 6 muajsh. Ndërkohë që nëna e tij ikte e vinte shpesh nga Italia por nuk arrinte të shkëputej prej tij.

Drejtoresha më tha që atëherë që të mos humbja kohë se nuk do të ma jepte. Unë e kisha marrë në shtëpi, e kisha larë, e kisha ushqyer, sepse mund t’i marrësh fëmijët në fundjavë që të kujdesesh dhe më pas e ktheja në jetimore”- rrëfeu Shala.

Megjithatë, siç rrëfeu gjatë intervistës atletja, ajo nuk është tërhequr nga dëshira e saj për t’u bërë nënë. “Unë edhe nëse lind vetë, prap do të adoptoj një fëmijë dhe besoj shumë shpejt, sapo të vë në vijë disa gjëra të miat.”-u shpreh Shala.