Emma Watson, triumfuese në MTV TV & Movie Awards
Emma Watson ka fituar çmimin e parë si aktorja më e mirë në MTV TV & Movie Awards, mbrëmjen e djeshme. Ish ylli i Harry Potter tregoi anën e saj më të mirë si aktore në rolin e Belle, në filmin “E bukura dhe Bisha” . Aktorja e cila arriti të dilte mbi yjet e tjerë meshkuj përfshirë James McAvoy dhe Hugh Jackman, tha se ky rol për të ishte shumë kuptimplotë.”Çmimi i parë që nuk i ndan kandidatët bazuar në gjininë e tyre tregon shumë për mënyrën se si ne e perceptojmë përvojën njerëzore”-tha ajo, shkruan BBC. Trajleri i filmit “E bukura dhe bisha”, pati thuajse 130 milion shikime në 24 orë. “Veprimi i MTV-së për të krijuar një çmim jo-gjinor për aktrimin do të thotë diçka ndryshe për të gjithë. Por për mua kjo tregon se aktrimi ka të bëjë me aftësinë për të vënë veten në këpucët e dikujt tjetër dhe kjo nuk duhet të ndahet në dy kategori të ndryshme. Empatia dhe aftësia për të përdorur imagjinatën tuaj nuk duhet të kenë kufizime. Kjo është shumë domethënëse për mua,”-ka thënë Watson. MTV TV & Movie Awards nuk është ngjarja e parë që prezanton një kategori neutrale gjinore, pasi edhe Grammy Awards shmangu çmimet mashkull dhe femër në vitin 2011.
