Libri më “shpërthyes” i dekadës. Autobiografia nga Princ Harry një ”bombë me sahat”

Libri më “shpërthyes” i dekadës, ka një datë publikimi. Më 10 janar 2023, del në treg autobiografia e shumëpritur e Princit Harry.

Autobiografia është pjesë e një projekti më të madh nga princi dhe Meghan Markle me shtëpinë botuese Penguin Random House. Që kur u larguan nga familja mbretërore, ata kanë filluar të ndërtojnë markën e tyre si manjatë mediatikë. Libri do të përfshijë të gjithë jetën e princit, nga fëmijëria e Harrit nën sytë e paparacëve deri te detyra e tij ushtarake në Afganistan, te martesa me Meghan Markle dhe lindja e dy fëmijëve të tij: Archie, 3 vjeç dhe Lilibet 1 vjeç.

Ekspertët i kanë quajtur kujtimet e Princit Harry “një bombë me sahat”. Autobiografia ka qenë objekt spekulimesh intensive në botën botuese dhe mes fansave të familjes mbretërore. Tabloidët britanikë kanë diskutuar shpesh se sa i sinqertë do të jetë Harry në zbulimin e shkaqeve të ndarjes së tij me familjen dhe sa dëm do të jetë i gatshëm të shkaktojë në vendosjen e monarkisë.

Libri do të botohet në një kohë delikate për kurorën dhe publikun britanik, i cili po përshtatet me Mbretin Charles III dhe në të njëjtën kohë me paqëndrueshmërinë ekonomike dhe politike.