Luiz Ejlli flet për lidhjen me vajzën e Jozefina Topallit: Ishte si një flluskë sapuni

Marrëdhënia disavjeçare e Megi Topallit, vajzës së ish-kryetares së Kuvendit, Jozefina Topalli, dhe Luiz Ejllit, ka marrë fund prej disa muajsh tashmë. Si fillim, pasi lajmi u përhap në media e portale, çifti nuk deshi ta komentonte publikisht këtë raport, por disa statuse dhe ngacmime virtuale, e konfirmuan shpejt lajmin se Luizi dhe Megi nuk ishin më bashkë.

Ndonëse nuk kishte folur më parë publikisht për këtë marrëdhënie, sot Luizi e përshkroi si një flluskë sapuni atë që kishte ndodhur për disa vite me Megin.
I ftuar në “Pasdite në Top Channel”, për të prezantuar këngën e tij të re, me të cilën do të marrë pjesë në Festivalin e RTSH-së, Luizi nuk iu shmang edhe pyetjeve private.

I pyetur nga moderatorja për lidhjen me Megin, ai tha se nuk kanë qenë të fejuar, por “ishte thjesht një lidhje”, e cila ishte e destinuar të përfundonte: “E di si ishte? Si një flluskë sapuni, e cila vjen e fryhet, ngrihet lart, fillon merr ngjyrat e bukura, bëhet një mrekulli atje dhe pastaj shpohet…” – tha Luizi duke shtuar se gjërat përfundojnë dhe kjo është e kuptueshme si për të gjithë njerëzit.

I pyetur për arsyet, këngëtari tha se tashmë ato nuk i interesojnë askujt: “Kam pasur dhe do të kem gjithmonë respekt, si për të, ashtu edhe për familjen e saj e për gjithçka. Nuk janë pak ato vite që kemi kaluar, nga unë do kenë mirënjohje gjithmonë”, – e mbylli Luizi këtë temë, e cila nuk është komentuar pak.