Prej vitesh në gjyq për pronat, shpërthen këngëtarja: Vjedhje e trimave të politikës shqiptare!

Rovena Dilo ka shpërthyer sot për padrejtësinë që ajo pretendon se i është bërë kundrejt pronës së familjes së saj, konflikti për të cilën ka vazhduar gjatë.

E ftuar tek një emision televiziv, këngëtarja shumë e njohur për publikun tregoi se është ende në gjyq për të zgjidhur çështjen e 3 viteve më parë.

Kujtojmë se që prej majit të 2016-ës, Rovena Dilos iu konfiskua lokali i saj që gjendej në zonën e ish-Bllokut, ngjarje e cila u bë subjekt sherri mes këngëtares dhe dajës së saj Agron Vreto.

Këngëtarja u shpreh:

Unë jam në një gjyq! Familja ime, familja Vreto është familje shumë e madhe sepse mamaja ime ka 8 motra dhe vëllezër. Unë jam në një gjyq shumë të padrejtë. Jo më larg se një muaj përpara, kryegjyqtari i treshes që kishte gjyqin tim u hoq nga Vetingu. Ai quhet Ilir Mustafai dhe sigurisht që ishte një nga ata gjykatës që ishte totalisht i blerë dhe i shitur!”
Ajo tha gjithashtu se vendimi për grabitjen e pronës së familjes së saj dihej që në fillim, pasi ajo ishte bërë pre e mafiozëve dhe trimave të politikës shqiptare.

Rovena Dilo shtoi:

Eshtë tragjedi shumë e madhe të kesh përpara teje gjykatës që e dinë që në fillim çfarë verdikti do të të japin, shumë e rëndë. Nuk ke as ku të drejtohesh, as kujt t’i kërkosh ndihmë dhe duhet të shikosh vjedhjen e pronës tënde, vjedhjen e pronës së nënës tënde, të tezeve të tua, të kushërirave të tua të para, të gjyshërve të tu, nga njerëz, nga mafiozë, nga trima të politikës shqiptare!”