Si sot 41 vite më parë, u shënua ”dasma e shekullit”

Janë 25 vite nga ikja e saj, por vijon të jetë Princesha më e komentuar. Lady Diana, princesha e Uellsit është ende në mendjen dhe në zemrat e njerëzve. Ajo ishte një grua plot jetë dhe gjallëri dhe u fali lumturi shumë njerëzve, edhe pse u bënë 25 vite nga aksidenti tragjik që i mori jetën.

41 vite më parë, pikërisht më 29 korrik të vitit 1981 të gjithë i kishin sytë te Lady Diana. Ajo shkoi në ceremoninë e martesës e shoqëruar nga babai i saj, me karrocën që ishte përdorur më parë nga mbretëresha dhe princi Filip. Dasma e Dianës me princin Charles është konsideruar si “dasma e shekullit”.

Në kongregacionin në Katedralen e Shën Palit morën pjesë 3 500 veta, ndërsa 750 milion të tjerë e ndoqën ceremoninë e dasmës së tyre në mbarë botën, sipas shifrave të BBC për transmetimin “live” në 74 shtete. “Unë nuk e dija se çfarë më priste. Një ditë shkoja në punë me autobus, ndërsa ditën tjetër isha princeshë”,-ka thënë Diana.

Fustani i nusërisë ishte i bardhë, i fryrë, me mëngë të mëdha, edhe ato të fryra dhe jakë me frudë. Ai u krijua nga dy stilistët e njohur David dhe Elizabeth Emanuel, dhe zhuponi prej taftaje në ngjyrë fildishi kushtonte 9000 paund. Kurora që Diana mbajti në kokë ishte pjesë e trashëgimisë së familjes Spencer. Diana vijonte të punonte si edukatore kopshti në “Young England Kindergarten”, Pimlico.