Ndotja e Drinos kërcënim për ekosistemin e Vjosës

Rënia e ndjeshme e nivelit të ujit në lumin Drinos, në territorin e Gjirokastrës, ka zbuluar një realitet tronditës mjedisor. Shtrati i lumit është mbushur me mbetje plastike, qese, materiale urbane dhe objekte të ndryshme të ngurta, të akumuluara prej vitesh dhe të fshehura më parë nën ujë. Pamjet e fundit tregojnë një situatë alarmante, që dëshmon për mungesën e kujdesit dhe monitorimit sistematik të këtij ekosistemi.

Problemi merr përmasa edhe më të rënda për faktin se lumi Drinos derdhet në lumin Vjosë, i shpallur Park Kombëtar dhe i konsideruar si një nga lumenjtë e fundit të egër në Evropë. Kjo do të thotë se ndotja nuk mbetet vetëm një çështje lokale e Gjirokastrës, por përbën rrezik real për gjithë pellgun ujëmbledhës të Vjosës dhe më tej për Adriatikun.

Vetëm pak kohë më parë, Kroacia ngriti zyrtarisht shqetësimin për ndotjen e detit Adriatik, duke paralajmëruar ndjekje ligjore ndaj vendeve që ndotin detin përmes lumenjve, përfshirë edhe ato që derdhen nga territori shqiptar. Në këtë kontekst, ndotja e Drinos dhe Vjosës e vendos Shqipërinë përballë një rreziku diplomatik dhe ligjor, që mund të cenojë imazhin ndërkombëtar të vendit.

Ekspertët e mjedisit theksojnë se situata kërkon ndërhyrje urgjente, si pastrimi i shtratit të lumit, vendosja e barrierave për mbetjet dhe krijimi i një sistemi të vazhdueshëm monitorimi. Në të kundërt, ndotja do të vazhdojë të përhapet drejt detit, me pasoja të rënda për biodiversitetin, turizmin dhe shëndetin publik.

Banorët dhe ambientalistët kërkojnë veprime konkrete, duke paralajmëruar se mbrojtja e Vjosës nuk mund të mbetet vetëm në dokumente, nëse degët e saj, si Drino, vazhdojnë të trajtohen si landfille të hapura.