Agjenti i Cristiano Ronaldos nis bisedimet për rikthimin te Real Madridi

Zërat e largimit të Cristiano Ronaldos nga Juventusi në fund të sezonit, po shtohen nga ditë në ditë. Dështimi i radhës në Champions League me bardhezinjtë, e ka zemëruar fituesin e pesë “Topave të Artë”, i cili dëshiron të nisë një aventurë të re.

“Marca” dhe “AS” raportojnë se Jorge Mendes, agjenti i sulmuesit 36-vjeçar, po negocion me Florentino Perez, kreun e “Los Blancos”. Për momentin bëhet fjalë vetëm për sondazhe dhe bisedime paraprake për të mësuar nëse ekziston mundësia e rikthimit te Reali.

CR7 do ishte i mirëpritur në “Santiago Bernabeu”, aty ku shkëlqeu dhe fitoi gjatë nëntë sezoneve që veshi fanellën e kampionëve të Spanjës (2009-2018). Dy opsionet e tjera për të ardhmen e portugezit janë Manchester United dhe PSG. Opsioni i dytë duket më i mundshëm, por mund të ndodhë vetëm nëse largohet Mbappe nga Parisi.