Allegri nuk e bën dramë: Luajtëm mirë në pjesën e parë, por kemi limite!

Juventus pësoi një humbje të rëndë 4-0 në transfertën ndaj Chelsea-t. Trajneri Massimiliano Allegri pas ndeshjes nuk e ka bërë dramë disfatën, por theksoi se skuadra e tij për momentin ka limite.

“Mendoj se pjesa e parë ishte e mirë. Pas pushimit ata vazhduan të bëjnë presing, ndërsa ne ishim shumë të dobët në golin e dytë dhe të tretë që pësuam. Lejuam shumë goditje këndi, ku ata janë shumë të fortë fizikisht. Është zhgënjyese të pësosh katër gola, por objektivi u arrit dhe tani duhet të mendojmë për ndeshjen e së shtunës në kampionat kundër Atalantës.

Kishte momente kur ne e dorëzonim topin shumë lehtë, duke u përpjekur të bënim pasime vertikale shumë shpejt, në vend që ta mbanim topin. E bëjmë shpesh këtë gabim dhe duhet të punojmë për ta rregulluar. Diçka të tillë nuk mund ta bësh kundër kampionëve të Europës. Skuadra nuk ishte aspak keq në pjesën e parë. Pas golit të dytë dhe të tretë e humbëm besimin.

Në ndeshjen e parë ne ishim të përqendruar në mbrojtje gjatë 90 minutave, kurse këtu vetëm në 45 minuta. Gjithsesi jemi kualifikuar dhe tani të fokusohemi te ndeshja e radhës. Sot i urova djemtë për kualifikimin. Kemi limite si skuadër dhe nuk mund ta mohojmë diçka të tillë. Do punojmë që të përmirësohemi”, deklaroi Allegri.