ANALIZA/ Luis Suarez, dhurata e Barcelonës që po i jep titullin Atleticos

3 nga 4 fitoret e fundit të Atletico Madrid, mbajnë firmën e Luis Suarez. Sulmuesi uruguaian përmbysi Eibarin të enjten në mbrëmje, duke shënuar golin e barazimit në fundin e pjesës së parë, ndërkohë që në fraksionin e dytë fitoi një penallti që e ktheu po vetë në gol. Diego Simeone ka pasur nevojë për finalizimet e tij, pasi deri më tani ka shënuar 11 gola në La Liga, duke qenë golashënuesi më i mirë së bashku me Messin.

Atletico falë golave të Suarez e sheh veten në vendin e parë me 7 pikë më shumë se Real Madrid dhe 10 më shumë se Barcelona, por dhe me avantazhin se ka dhe një ndeshje për të rikuperuar. Katalanasit në fakt e dhuruan te Los Colchoneros falas në verë, pasi e quajtën si të panevojshëm në ekipin e tyre.

Diego Simeone kishte nevojë për një sulmues goli, teksa vendosi që të hiqte dorë nga Morata, për të afruar më pas Suarezin, duke i paguar vetëm kontratën. Barcelona duket se tashmë po vuan gabimin e madh që ka bërë në merkato. Ish-presidenti i katalanasve Bartomeu e cilësonte Suarezin jashtë planeve për sezonin e ri, duke u përpjekur që të bindte edhe tifozët.

Me një lëvizje të zgjuar Atletico arriti që të siguronte një qendërsulmues goli, ndërkohë që Blaugranat vijojnë të vuajnë mungesën e një të tilli duke përshtatur Messin në shumë ndeshje. “Mua më duket çmenduri ajo që bën me Suarezin. Ai u largua falas dhe ata paguan vetëm vitet e kontratës, duke ja dhënë një rivali direkt për titullin”, u shpreh sulmuesi argjentinas në një intervistë të dhënë në verë.

Shumë tifozë me siguri që po mendojnë të njëjtën gjë si Messi duke parë situatën aktuale. Koeman dhe drejtuesit e Barcelonës janë penduar së tepërmi që lanë të lirë një sulmues të tillë, që në fakt po arrin që të udhëheq Atleticon drejt titullit kampion. /R.Lika-Koha Jone/