Arrihet akordi, Ancelotti firmos në Premier League
Vetëm një javë larg Napolit dhe Carlo Ancelotti është gati për të vijuar një eksperiencë të re në stol.
Mediat italiane dhe ato britanike bëjnë me dije se ish trajneri i Milanit ka gjetur akordin me klubin e Premier League, Evertonin. Duke iu referuar këtyre burimeve, Ancelotti ka pasur bisedime konkrete me presidentin e Everton, Bill Kenwright dhe zyrtarizimi i tij te klubi nga Liverpool do të bëhet në orët e ardhshme.
Te klubi anglez, Ancelotti do të zërë vendin e Marco Silva, i shkarkuar pak ditë më parë. Deri më tani, Everton është drejtuar nga Duncan Ferguson, por me ardhjen e 60-vjeçarit në klub hierarkia do të ndryshojë.
Kjo lëvizje do të ishte një rikthim për Ancelottin në Premier League. Gjatë viteve 2009-2011, italiani drejtoi Chelsea, me të cilët fitoi titullin kampion. Ndërkaq, Everton bëhet skuadra e 10 e Ancelottit në karrierë, pas eksperiencave te Reggiana, Juventus, Milan, PSG, Real Madrid apo dhe Bayern Munich.
