Arrihet akordi me pasuesin e Koeman te Barcelona, ja kush do të jetë strategu i ri

Ronald Koeman u shkarkua nga drejtimi i Barcelonës pas humbjes ndaj Rayo Vallecanos. Drejtuesit e klubit katalan janë vënë menjëherë në lëvizje për të gjetur trajnerin e ri që do të marrë drejtimin e ekipit. Mediat spanjolle zbulojnë se duke qenë se sfida e ardhshme është vetëm dy ditë më vonë ndaj Deportivo Alaves, drejtuesit e klubit pritet t’ia besojnë drejtimin e përkohshëm të skuadrës, trajnerit Sergi Barjuan, i cili është aktualisht trajner i Barcelonës B.

Sa i përket trajnerit të ri, ai me shumë mundësi do të jetë Xavi Hernandez. Ky i fundit nuk e ka fshehur asnjëherë dëshirën për të marrë drejtimin e katalanëve, skuadër në të cilën është rritur dhe ka shkruar historinë si futbollist. Vetëm pak ditë më parë Xavi deklaroi gatishmërinë për t’u ulur menjëherë në pankinën e Barcës dhe së fundi mësohet se ka pasur edhe kontakte direkte me presidentin Joan Laporta, megjithatë para se të firmosë, ish kapiteni do të kërkojë edhe plotësimin e disa kushteve.

Xavi drejton Al Sadd në Qatar, po ka një klauzolë në kontratë, që mund të largohet menjëherë, nëse i vjen një ofertë nga Barcelona, ndaj nëse arrin marrëveshjen, mund të fluturojë drejt Katalunjës.