Asllani: E ndjeva shumë golin, ishte si një finale për ne!

Kristjan Asllani ishte protagonist absolut në fitoren historike të Shqipërisë ndaj Andorrës, duke shënuar golin e vetëm të takimit që i dha kuqezinjve tre pikë jetike dhe kualifikimin në Play Off-in e Botërorit 2026. Pas sfidës, mesfushori kuqezi u shfaq i emocionuar dhe i lumtur për kontributin e tij.

Në një deklaratë për Tv Klan, Asllani pranoi se pjesa e parë ishte tepër e vështirë, pasi Andorra u mbrojt fort dhe Shqipëria hasi vështirësi në qarkullimin e topit. Sipas tij, ndryshimet që erdhën nga stoli bënë diferencën në pjesën e dytë.

“E ndjeva shumë golin. U gëzuan të gjithë shqiptarët dhe jemi shumë të lumtur. E kishim të vështirë në pjesën e parë. Ata luajtën 4-4-2 dhe nuk po gjenim mënyra për të nxjerrë topin.”

Mesfushori shtoi se energjia e lojtarëve të aktivizuar në pjesën e dytë ndikoi pozitivisht në ritmin e skuadrës: “Në pjesën e dytë, çunat që u futën nga stoli na ndihmuan shumë. E dinim që ishte një finale dhe jemi shumë të lumtur. Trajneri na bëri komplimente. Nesër do të analizojmë ndeshjen.”