Asllani gjithnjë e më pranë largimit nga Torino, trajneri e lë në tribunë ndaj Romës

Torino do të zbresë në fushë sot në orën 18:00 për përballjen ndaj Romës, në kuadër të kampionatit të Serie A, por pa një emër të rëndësishëm në dispozicion. Mesfushori i Kombëtares shqiptare, Kristjan Asllani, nuk është grumbulluar për këtë sfidë nga trajneri Marco Baroni.

Vendimi i teknikut të torinezëve për ta lënë jashtë listës 23-vjeçarin ka shtuar edhe më shumë dyshimet mbi të ardhmen e tij te Torino. Edhe pse Asllani ka marrë minuta në 15 ndeshje gjatë këtij sezoni, paraqitjet e tij nuk kanë qenë bindëse dhe nuk ka arritur të fitojë një rol të qëndrueshëm në skuadër.

Përjashtimi nga ndeshja ndaj Romës shihet si një sinjal i qartë se mesfushori shqiptar nuk bën pjesë në planet e Baroni-t. Në këto kushte, largimi i Asllanit nga Torino në merkato duket një opsion gjithnjë e më i mundshëm.