Asllani merr vlerësim negativ pas humbjes së Interit, fajtor në dy raste

Kristjan Asllani zhvilloi një ndeshje për t’u harruar mbrëmjen e djeshme ndaj Milanit. Mesfushori kuqezi u vlerësua me notë negative nga mediat italiane, 5, për paraqitjen e bërë në finalen e humbur të Superkupës.

I aktivizuar në minutën e 35-të, në vend të të dëmtuarit Çalhanoglu, ai ishte protagonist negativ në dy prej golave të Milanit. Fillimisht Asllani humbi topin, nga i cili erdhi goditja e dënimit për golin e parë të Djallit, ndërsa në të 93-ën kompletoi paraqitjen zhgënjyese, duke mos mbuluar Leaon, që dha asistin te Abraham për golin e fitores 3 me 2 të Milanit.

Kritikat në Itali kanë qenë të shumta për Asllanin, por sipas tyre ai nuk ishte fajtori i vetëm që Interi u përmbys nga Milani mbrëmjen e djeshme.