Barcelona gati të “blindojë” Yamal deri në vitin 2031

Barcelona ka siguruar të ardhmen e yllit të ri Lamine Yamal. Sulmuesi spanjoll i lindur në vitin 2007 pritet të nënshkruajë sot kontratën e re që do ta mbajë të lidhur me klubin katalanas deri në verën e vitit 2031. Agjenti i tij, Jorge Mendes, do të zhvillojë sot një takim me drejtuesit e Barcelonës për të finalizuar marrëveshjen që zgjat kontratën aktuale, e vlefshme deri në qershor 2026.

Yamal, i cili më 13 korrik mbush 18 vjeç, ka regjistruar tashmë 106 paraqitje me ekipin e parë të Barcelonës, duke shënuar 25 gola dhe dhënë 34 asistime. Me rinovimin e ri, ai do të bëhet lojtari më i paguar i skuadrës, duke kaluar edhe mesfushorin holandez Frenkie de Jong, i cili aktualisht përfiton 18 milionë euro neto në vit.

Ky është një tjetër hap i rëndësishëm për klubin pas zyrtarizimit të dy rinovimeve të tjera të mëdha ditët e fundit: trajneri gjerman Hansi Flick ka firmosur deri në vitin 2027, ndërsa sulmuesi brazilian Raphinha ka rinovuar deri në vitin 2028.