Belgjika shtyn kualifikimin për në Botëror, ndalet nga Kazakistani

Belgjika do të duhet të presë edhe pak për të siguruar kualifikimin e drejtpërdrejtë në Kampionatin Botëror 2026. “Djajtë e Kuq” të Rudi Garcias, pa yjet e dëmtuar Lukaku, De Bruyne dhe Courtois, nuk shkuan më shumë se një barazim 1-1 në transfertën ndaj Kazakistanit, në Nur-Sultan.

Vendasit kaluan në avantazh që në minutën e 9-të me Satpayev, ndërsa Belgjika barazoi në fillim të pjesës së dytë falë golit të Vanaken në minutën e 48-të. Kazakistani mbeti me një lojtar më pak në fushë nga minuta e 77-të, pas kartonit të kuq të Chesnokov, por Belgjika nuk arriti të përmbyste rezultatin.

Pavarësisht barazimit, Belgjika mbetet në krye të Grupit J me dy pikë avantazh ndaj Maqedonisë së Veriut. Të martën, skuadra belge do të ketë mundësinë të vulosë kualifikimin, teksa pret në shtëpi Lihtenshtajnin tashmë të eliminuar.