Bellingham prezantohet te Reali me 5-ën e Zidane: S’dua të krahasohem me të, është përgjegjësi e madhe

Jude Bellingham është prezantuar zyrtarisht si futbollist i Realit të Madridit, teksa ka firmuar për 6 sezone. Mesfushori 19-vjeçar anglez, ish-futbollist i Dortmundit, do të veshë fanellën me numrin 5, që dikur e mbante Zidane.

“E admiroj shumë Zidane dhe është një numër që më frymëzon. Nuk dua të krahasohem me të, sepse jam ndryshe, por jam i kënaqur të vesh këtë fanellë që, në vetvete, është një përgjegjësi e madhe.

Zidane ishte një lojtar që e kam admiruar gjithmonë, për mua ishte më i miri. Dua të vazhdoj këtë trashëgimi.

Paratë nuk janë aq të rëndësishme për mua, nuk mendoj kurrë për to kur marr vendime të tilla. E dua futbollin, isha i kënaqur me gjithçka që përfshin Realin e Madridit dhe i kërkova Dortmundit që të zgjidhte gjithçka shpejt”, deklaroi super ylli anglez.

Real Madrid do të paguajë 103 milionë euro në formë këstesh, ndërkohë që shuma totale me bonuese mund të shkoje deri në 134 milionë euro.