“Bisha” e Spanjës tregon arsyet që e shtynë të largohej nga Barcelona

Adama Traore debutoi me Spanjë të mërkurën në mbrëmje në mënyrën më të mirë, duke bërë që Barcelona të pendohet jo pak që e la të lirë në vitin 2015. 24-vjeçari tregoi një fuqi dhe teknik të admirueshme, edhe pse luante për herë të parë me fanellën e iberikëve.

Ai zuri vendin e Sergio Canales në minutën e 62-të, duke bërë një performancë fantastike në krahun e Semedos, si dhe krijoi një shans të mirë për Dani Olmo.

Anësori është në kulmin e karrierës, por dikur ai ka qenë dhe pjesë e Barcelonës, në akademinë e famshme të La Masia-s. Debutimin në ekipin e parë e bëri në moshën 17 vjeç. Gjithsesi katalanasit nuk i dhanë shumë hapësira me Messin, Suarez dhe Neymar, apo pa harrua Pedro Rodriguez.

Në vitin 2016 ai dha një intervistë për Mundo Deportivo, duke treguar dhe arsyet që e shtyn që të largohet: “Nuk e mbylla mirë me Barcelonën. Ika sepse ata nuk më dhanë mundësi. Nuk e dija se çfarë të bëja, pasi nuk më thanë se përse ndodhte një gjë e tillë”. /R.Lika-Koha Jone/