Brdaric: I jam mirënjohës çdo tifozi, kundër Partizanit synimi i vetëm është fitorja!

Vllaznia do të presë Partizanin në stadiumin “Loro Boriçi”, ditën e nesërme në orën 16:45, duel i vlefshëm për javën e 12-të të Abissnet Superiores. Në këtë takim shkodranët do të kërkojnë vazhdimësinë e rezultateve pozitive për të qëndruar afër dy vendeve të para. Në konferencën për shtyp, trajneri Thomas Brdaric, ka folur për takimin me Partizanin dhe për vështirësinë që kjo ndeshje ka.

“Nesër është një sfidë e madhe për ne, do jemi në fushën tonë, qytetin tonë dhe me tifozët tanë dhe shpresojmë të bëjmë një paraqitje sa më të mirë të mundshme. Kemi punuar nga ana mentale me lojtarët për sa i përket kësaj çështjeje dhe jemi përqendruar vetëm te fitorja për nesër, ky është qëllimi ynë i vetëm për momentin.

Pikë së pari ne duhet të kuptojmë se po ndërtojmë Vllazninë e re dhe kjo gjë kërkon pak kohë. Çdokush e di që ne nuk kemi kushtet më të mira, tani nuk do të ankohemi për këtë gjë, por duhet të fokusohemi te gjerat kyçe.

Kemi një trend të mirë rezultate, megjithatë nesër është një sfidë tjetër me Partizanin edhe ata kanë pasur rezultateve pozitive në ndeshjet e fundit. Megjithatë do të futemi në fushë për të marrë tre pikët dhe për të marrë fitoren.

Sigurisht që pjesëmarrja e mbështetësve varet nga kushtet atmosferike në qytet, shpresoj që të jetë kohë e mirë. Unë e kam thënë gjithmonë që i jam falënderues çdo tifozi që vjen në stadium, qoftë një tifoz të vijë apo shumë më shumë unë prap do i falënderoj dhe do u jem shumë mirënjohës. Megjithatë nëse stadiumi do jetë i tejmbushur do jetë një shtysë shumë më shumë edhe për ne”, ka deklaruar tekniku i shkodranëve.