Brdaric: Laçi ekipi më i mirë se të tjerët, por ne duam fitoren!

Vllaznia do të zbresë në fushë ndaj kurbinasve në ndeshjen e kësaj të shtune me objektivin për të marrë 3 pikët. Në konferencën për shtyp Thomas Brdaric u shfaq optimist pavarësisht nevojës urgjente që ka Laçi për pikë dhe ndryshimin e fundit që kanë bërë kurbinasit në stol duke emëruar Shpëtim Duron trajner.

“Që pardje dhe dje jemi përqendruar i gjithë ekipi te ndeshja kundër Laçit duke e ditur se është ekip më i mirë se të tjerë që jemi përballur deri tani. Jemi të fokusuar plotësisht aty pasi është shumë e rëndësishme si ndeshje. Kanë mungesa? Jemi të përgatitur për çdo sfidë, dimë gjithçka, marrim çdo informacion dhe dimë edhe pikat e dobëta që kanë skuadrat. Dihet që kanë ekip të fortë, por ka diçka që fusha e tyre është pak e vogël.

Do ta nisim ndeshjen si normalisht, por do të ndryshojmë në bazë të ndeshjes. Edhe ne do të tregojmë ashpërsinë tonë, por gjithçka varet nga strategjia që do të ndjekim gjatë sfidës. Ne kemi një favor që në ashpërsinë e tyre, atyre u mungojnë tifozët. Në do t’i përshtatemi situatës dhe ekipet e tjera e shohin dhe kanë respekt për lojën që bëjmë, por ne luajmë gjithmonë për të fituar.

Dënimi nga FSHF? Ne duhet të kujdesemi herën tjetër më shumë se klubi nuk ka aq shumë para sa të paguajë edhe gjoba, por ndodhi. Nëse do të ishin hapur dyert, do të kishin qenë 10 mijë vetë në stadium. Por duhet të kujdesemi që të mos ndodhë më”, deklaroi Brdaric.