Carabao Cup/ Arsenali fiton aktin e parë gjysmëfinal ndaj Chelsea-t

Chelsea i drejtuar nga Liam Rosenior pësoi një humbje në shtëpi në gjysmëfinalen e parë të Carabao Cup, duke u mposhtur 2-3 nga Arsenali i Mikel Artetës në “Stamford Bridge”. Një rezultat që i jep avantazh të konsiderueshëm “Topçinjve” përpara ndeshjes së kthimit, e planifikuar më 3 shkurt në “Emirates”.

Arsenali e nisi fuqishëm takimin dhe kaloi në epërsi që në minutën e 7-të me Ben White. Në fillimin e pjesës së dytë, Gyokeres dyfishoi shifrat në minutën e 49-të, duke e vënë Chelsean në vështirësi. Reagimi i londinezëve blu erdhi shpejt, me Garnacho që ngushtoi diferencën në minutën e 57-të. Megjithatë, Zubimendi riktheu avantazhin e dyfishtë për Arsenalin në minutën e 71-të.

Chelsea nuk u dorëzua dhe sërish Garnacho shënoi në minutën e 83-të, duke rihapur ndeshjen. Përpjekjet e fundit të vendasve nuk mjaftuan dhe Arsenali largohet nga Londra me një fitore të çmuar, duke hedhur një hap të madh drejt finales së Carabao Cup.