Chivu para derbit: Dua t’u dhurojmë një të hënë të qetë për tifozët tanë!

Pas pauzës së kombëtareve, Interi rikthehet në skenë me sfidën më të nxehtë të sezonit: derbin ndaj Milanit. Trajneri Cristian Chivu, që pritet t’i ketë nga minuta e parë Thuram dhe Lautaro Martínez, foli në konferencë për shtyp duke bërë një panoramë të gjendjes së ekipit dhe rëndësisë së këtij dueli.

“Është një ndeshje që e sheh gjithë bota. E dimë çfarë përfaqëson për tifozët tanë dhe duam t’u dhurojmë një të hënë pa tallje nga miqtë milanistë. Duhet të bëjmë gjithçka për të marrë tre pikët,” tha ai. Tekniku e konsideron sfidën të veçantë, por nënvizoi se qasja profesionale mbetet e njëjtë. “Janë gjithmonë tre pikë në lojë, edhe pse pritshmëritë janë të mëdha. Derbi nuk ka favorite, fillon gjithmonë nga 0-0.”

Në lidhje me mundësinë për të marrë një kontroll të hershëm të kampionatit, Chivu u shpreh se renditja është ende e ngushtë dhe sezoni i gjatë. “Duhet të futemi në fushë me vendosmëri dhe përqendrim, pavarësisht kundërshtarit.”

Chivu theksoi se edhe pse e ka përjetuar derbin si lojtar, tashmë për të çdo ndeshje është “si e para”. Ai kërkoi qetësi dhe maturi: “Atmosfera përpara derbit shpesh është e mbingarkuar. Dua një ndeshje të bukur, që të shërbejë edhe si reklamë për futbollin italian.”

I pyetur për aktivizimin e dyshes sulmuese, trajneri shmangu komentet taktike, ndërsa për Lautaron pati vetëm vlerësime: “Është një sulmues i kompletar, ndër më të mirët në Itali dhe jashtë saj. Ka instinkt, agresivitet dhe është shembull për ekipin.”

Chivu pranoi cilësitë e Milanit si në hapësirë, ashtu edhe në lojën e ngushtë, por theksoi se Interi nuk do të ndryshojë parimet e veta. “Gjatë ndeshjes gjithçka mund të marrë kah tjetër. Duhet fleksibilitet, përvojë dhe aftësi për të lexuar momentet.”