Conte nuk e bën dramë: Ndeshje e çuditshme, humbje e pamerituar!

Interi pësoi një humbje të papritur 2-1 në fushën e Sampdorias duke ndalur ecurinë pozitive. Trajneri Antonio Conte nuk e bën dramë, madje ai ka lavdëruar futbollistët e tij për rastet e krijuara, duke e cilësuar si një ndeshje të çuditshme.

“Ndeshje pak e çuditshme. Kaluam nga një penallti e gabuar te dy gola të pësuar. Mendoj se ekipi po bën mirë, luan dhe krijon raste. Ndodh që ndonjëherë të humbasësh ndeshje të tilla, që nuk i meriton. Edhe pse mendoj se në atë penallti që na u dha, mund të shënonim. Në pjesën e parë dominuam dhe u gjendëm në disavantazhin e dy golave.

Ndikoi mungesa e Lukakut? Nuk është hera e parë që luajmë pa Romelun. I dimë shumë mirë vlerat e tij, por nuk ishte në 100 për qind as kur u aktivizua. Më vjen keq, pasi meritonim diçka më shumë.

Ka shumë gjëra për t’u analizuar dhe për t’u përmirësuar. Ekipi tregoi dëshirë, por fati nuk ishte në anën tonë. Faza e sulmit ishte e shkëlqyer, duke marrë në konsideratë rastet e krijuara. Sulmojmë me shumë futbollistë, ndërkohë që futen edhe mesfushorët”, deklaroi Conte. /Rozalb-Lika-Koha Jone/